Oudleersders
Oudleerders wat maandelikse bydraes maak se foto’s verskyn hier op die webblad. As u, as oudleerder of belangstellende ‘n bydrae wil maak, skakel die skoolhoof, mev Anje Boshoff by sel: 072 970 7050. U kan ook dieingevulde debietordervorm per e-pos terugstuur aan navrae@volkskoolorania.co.za. Of voltooi die aanlyn debietordervorm.
Oudleerders en belangstellendes kan ‘n bydrae maak om nog ‘n Afrikanerkind die geleentheid te gee om by Volkskool Orania in te skryf. Ons volk is in ’n oorlewingstryd en om ons jeug toe te rus met die nodige opvoeding en opleiding, is ‘n manier om prakties deel te neem om ‘n toekoms vir ons volk te verseker. By Volkskool Orania word nie alleen gefokus op uitnemende akademiese bemagtiging nie, maar ook om ‘n selfstandige Afrikanerjeug te kweek vir wie hulle kultuur, taal en Christelike waardes hul erns is en wat die uitdagings van die tyd die hoof kan bied.
Gooi jou stuiwer in die armbeurs – hierdie dinge gebeur nie vanself nie! Dit verg ‘n toegewyde onderwysspan wat skouer aan die wiel sit. Dit hét ons, maar ons moet ook ons ouers help om hulle kinders se skoolopleiding te kan bekostig. Onthou: hier is nie sprake van staatshulp nie. Ons volk het al opgestaan in die verlede – ons kan weer!
Rian Daubney
Matrikuleer in 2009 by Volkskool Orania. Hy woon sedert 2012 in Inverness, Skotland. By Asda (afdelingswinkel) begin hy onder op die leer en werk sy pad op na afdelingsleier. Einde van 2016 het hy oorgegaan na die NHS om opleiding as vakman te ontvang. Hy is aktief as noodhelper by die Rooikruis, kom graag in die buitelug, veral vir “paintball”, kleiduifskiet, bergklim, wintersport.
Erna Joubert
Erna Joubert was in Volkskool Orania vanaf 1996-2001. Sy het na skool au pair werk in die VSA gaan doen en daar is sy getroud met Stuart Olney. Sy bedryf nou ‘n gastehuis met 7 kamers in Detroit
Joanelle Everson
Matrikuleer in 2010 by Volkskool Orania. Behaal BA en BA Honneurs in Dokumentêre Video Produksie met lof en word telkens aangewys as die beste tweedejaars-, derdejaars- en Honneursstudent aan die Noordwes Universiteit. Joanelle werk sedert 2015 as video redigeerder by iGala Productions.
Arno Everson
Matrikuleer in 2012 by Volkskool Orania. Na ‘n jaar se avontuur in Johannesburg, is hy tans Skakelbeampte vir die Hartlandstigting op Orania waar hy Kommunikasiebeheer en bemarking vir dié instansie hanteer
Jantoené Oosthuizen
Matrikuleer in 2014 by Volkskool Orania. Sy is tans ‘n sjef by die Pienk Zebra restaurant op Orania waar sy sedert 2015 betrokke is. Jantoené het die uiteenlopende kursusse “Restaurant management” en “Paralegal practitioner” by Get Smarter op afstandleer deur die Universiteit van Kaapstad voltooi.
Francis Prinsloo
Is in Volkskool Orania van 1999 tot 2007. Sy doen die Assistent Senior Sjef kursus nog op skool, daarna doen sy vroeë kinderontwikkeling. Reeds op skool is sy ‘n kranige medewerker by die skoolkoerant: Die Houtoog, en doen vandag steeds vrywillige radio- en klankwerk by die plaaslike radiostasie Radio Orania. In haar werktyd, is sy ‘n selfoonagent.
Angeliqa Vorster
Matrikuleer in 2014 waarna sy ondervinding opdoen in kliëntediens en boekhouding by Postnet. Sy het in 2016 na-uurs begin Boekhou studeer en werk tans by Pretoria FM as bemarker.
Ruaan van Dyk
Matrikuleer by Volkskool Orania in 2012. Hy doen ondervinding op in die rekenaarbedryf en begin in 2014 by OSK werk – Orania se Koöperatiewe Bank wat die Sakekamer se Ora’s administreer.
Jana Coetzee
Matrikuleer by Volkskool Orania in 2012 met Toerisme as een van haar vakke. Sy werk tans as Kliënte-bestuurder by Aan-die-Oewer Vakansie-oord op Orania
Johan Joubert
Matrikuleer by Volkskool Orania in 2011. Hy leer allerhande soorte dans en begin later ‘n dansstudio in Bloemfontein tot 2015. Tans toer hy in Amerika waar hy Amerikaners leer sokkie
Joost Strydom
Word groot in Orania. Matrikuleer in 2011. Studeer Kommunikasie en Antropologie aan NWU-PUK. Studenteraadslid. Behaal Golden Key Honour vir akademiese prestasie. Tans kommunikasiebeampte by die Orania Beweging.
Barend Uys
Matrikuleer in 2002 by Volkskool. Hy en Marinda by hulle kindertjies Mariné en Barend. Hy behaal ‘n meestersgraad in meganiese ingenieurswese aan UP in 2007. Geregistreer as ‘n “Chartered Engineer” by die Ingenieursraad van die Verenigde Koninkryk. Barend werk tans vir ‘n internasionale raadgewende ingenieursmaatskappy
Daniël en Almie Coetzee
Albei oud-Volkskoolleerders. Daniël tot in 2007 en Almie 2008. Daniël is tans die eienaar van DTC Dienssentrum in Orania en Almie is eienaar van DTC wassery en ma van Alet-Mari.
Haylie Nicholson
Haylie Nicholson (neé Menhenet). Bemarkingsbestuurder vir PC Supreme rekenaarhandelaars. Woon in Orania saam met haar man Freddie en seuntjie Derrick. Sy het in 2009 Volkskool bygewoon.
Huibrie Pretorius
(Neé Joubert):
Saam met haar man Janno en seuns Ludwig en Ian. Sy matrikuleer in 2002 by Volkskool waarna sy haarself as geoloog kwalifiseer en Geologie doseer by die Universiteit van die Vrystaat tot 2014. Vandag is sy ‘n voltydse ma.
Chris Joubert
Matrikuleer in 2004 by Volkskool Orania en gaan studeer Chemie by die Universiteit van die Vrystaat. Chris is ‘n aktiewe buitelugmens wat gereeld gaan stap en kamp. Hy bly daarby ‘n ewige student en is tans voltyds besig met sy PhD in Fisiese Chemie by Kovsies.